Akuza e rreme e Rusisë se Ukraina ka armë biologjike dhe kimike është një "shenjë e qartë" se Vladimir Putini, tashmë i dëshpëruar po mendon t'i përdorë ato vetë, thotë Joe Biden. Presidenti amerikan u shpreh se “shefi i Kremlinit është mbërthyer me shpatulla pas muri”, dhe po nxjerr pretendime të rreme, përfshirë këtu deklaratat se Amerika ka armë biologjike dhe kimike në Europë. Kjo thjesht nuk është e vertët, jua garantoj, ishte komenti i kreut të administratës amerikane. Rreziku që Putini ndërkohë, t`i përdorë të dyja sipas tij, është i madh. Biden kujtoi se presidenti rus ka përdorur armë kimike në të shkuarën. “Ne duhet të jemi të kujdesshëm për atë që do të vijë. Por Putini e di se do të ketë pasoja të rënda për të, për shkak të frontit të bashkuar të NATO-s”, shtoi Biden. Pohimet e tij i bëjnë jehonë komenteve të mëparshme nga zyrtarët të Uashingtonit dhe vendeve aleate, të cilët kanë akuzuar Rusinë për përhapjen e pretendimeve të paprovuara se Ukraina kishte një program armësh biologjike, e druhen se Moska mund ta përdorë këtë si prelud për të nisur dhe vetë sulme kimike ose biologjike. Reagimi i Biden erdhi pasi Pentagoni deklaroi më herët se ka “prova të qarta” që forcat ruse po kryejnë krime lufte në vendin fqinj. Përcaktimi që Biden i bëri javën e kaluar Putinit si "kriminel lufte", si "diktator vrasës" dhe "bandit", kanë shkaktuar një krisje edhe më të thellë në marrëdhëniet me Rusinë. Ministria e Jashtme ruse tha se ato ishin "të padenja për një figurë shtetërore të një rangu kaq të lartë" dhe rrezikoi prishjen e lidhjeve SHBA-Rusi. Përmes një note proteste dorëzuar ambasadorit amerikanë në Moskë, pala ruse paralajmëroi gjithashtu se marrëdheniet mes Rusisë e SHBA-së mund të ndërpriten plotësisht. Gjykata ndërkombëtare e drejtësisë e OKB-së ka urdhëruar tashmë Moskën të ndalojë pushtimin e saj dhe një prokuror në gjykatën ndërkombëtare penale ka nisur një hetim për krimet e luftës.