Ish-ndërtesa e parlamentit të Australisë u dëmtua sot nga zjarri i protestuesve për të drejtat e popujve aborigjenë vendas. Zyrtarët thanë se protestuesit u bënë të dhunshëm kur policia tentoi të shpërndante ceremoninë tradicionale të tymit që një numër aktivistësh po kryenin pranë hyrjes. Ndërtesa në kryeqytetin Canberra ka qenë parlamenti i parë federal i vendit nga viti 1927 deri në 1988, ndërsa tani është Muzeumi Australian i Demokracisë. Nuk kishte lajme për masën e dëmeve por në pamje shihej që tymi dilte nga dyert e drunjta në hyrjen kryesore të ndërtesës. Aktivisti Albert Hartnett tha se policia kishte përdorur ‘spray djegës’ për të shpërndarë demonstratën. Ndërtesa e klasifikuar si ‘trashëgimi kulturore’ ka parë një seri protestash nga grupet e të drejtave të popujve vendas indigjenë. Edhe në protesta të më parshme janë ndezur zjarre në dyert e saj. Autoritetet australine dënuan dëmtimet dhe deklaruan se “demokracia ekziston në vend, pa dallim race, feje dhe prejardhjeje”.