Në dy javët e fundit, sekretari i Përgjithshëm i NATO-s, Mark Rutte ka biseduar dy herë me presidentin serb Aleksandar Vuçiç. Ndonëse nga këto biseda nuk pati detaje për publikun, vec frazave të zakonshme për gatishmërinë për të përmirësuar bashkëpunimin dhe mbështetjen për paqen, analistët politikë thonë se duhet parë përtej. Sipas analistit politik në Serbi, Dushan Janjic që ka folur për DË, Vucic ka injoruar prej muajsh kryengritjet studentore dhe qytetare, e kjo valë pakënaqësie në rrugët e Serbisë është një shenjë për ndërkombëtarët se Presidenti i Serbisë nuk mund të shihet më si njeriu që jep garanci për stabilitetin rajonal. "Kjo tregon, se Serbia është në prag të një rreziku të madh sigurie dhe se sjellja e qeverisë po i kontribuon këtij procesi, i cili ka tërhequr edhe vëmendjen e NATO-s, sepse Serbia ka edhe rëndësi rajonale” thotë Janjic, që shton se sigurisht kërkesa kryesore e shefit të NATO-s ka qënë shmangia e konflikteve të armatosura me qytetarët. “Komuniteti ndërkombëtar duhet të marrë parasysh se në skenën politike në Serbi tani ka një lojtar të ri, e ata janë qytetarët e rebeluar që aktualisht kanë ndikimin më të madh në opinion”, pohon Janjic. Sipas analistit, Vucic ka marrë nga Rutte edhe një paralajmërim, ku bëhet fjalë për situatën e tensionuar në Bosnjë-Hercegovinë, " se koha ka mbaruar dhe se nuk ka më kohë për të ashtuquajturat lojëra të dyfishta dhe të trefishta të mbështetjes ose mosmbështetjes së Milorad Dodikut”.