19 ditë pas sherrit të bujshëm diplomatik në Shtëpinë e Bardhë mes Trump dhe Zelenskyt, që bëri xhiron e botës, krerët e SHBA dhe Ukrainës kanë zhvilluar këtë të mërkurë një bisedë të gjatë telefonike, por këtë herë krejtësisht ndryshe. Për 60 minuta, Donald Trump dhe Volodymyr Zelensky biseduan në telefon, në një frymë tashmë pozitive dhe me shpresën për t’i dhënë fund agresionit rus në Ukrainë. Vetë Trump njoftoi përmes një postimi në rrjetin “Truth Social” se kishte një bisedë shumë të mirë telefonike me Zelenskyn. “Pjesa më e madhe e diskutimit u bazua në telefonatën e djeshme me Presidentin Putin, me qëllim që të harmonizohen kërkesat dhe nevojat e Rusisë dhe Ukrainës. Jemi në rrugën e duhur”, shkruan Presidenti Trump. Më tej, Kreu i Shtëpisë së Bardhë thekson se palët janë duke shkuar drejt një rruge të përbashkët, dhe që i ka kërkuar Sekretarit amerikan të Shtetit, Marco Rubio, dhe Këshilltarit për Siguri Kombëtare, Mike Waltz që të bëjnë një përshkrim të duhur të pikave që janë diskutuar. Nga ana e tij, Presidenti Zelensky konfirmoi se këtë të mërkurë Rusia dhe Ukrainë kanë kryer një shkëmbim të të burgosurve të luftës. 175 ushtarë janë kthyer nga territoret e kontrolluara nga Kievi, dhe në këmbim Moska ka kthyer një numër të barabartë trupash ukrainase të kapur, si dhe 22 ushtarakë të plagosur rëndë. Ndërkohë, Kremlini konfirmoi këtë të mërkurë se Presidenti Vladimir Putin do të takohet me homologun Donald Trump, në Arabinë Saudite, vetëm një ditë pas telefonatës 90-minutëshe mes tyre, ku Rusia ra gjithashtu dakord të pezullojë sulmet në infrastrukturën energjetike të Ukrainës për 30. Hera e fundit që Rusia dhe Ukraina shkëmbyen robër luftarakë ishte në tetor 2024, kur secila palë liroi 95 të burgosur.