Në pamjet e publikuara sot nga autoritetet bjelloruse shihej mësymja e emigrantëve në gardhin kufitar, që u spraps me gaz lotsjellës dhe ujë me presion prej autoriteteve polake. Policia e Polonisë thotë se rreth 4000 emigrantë janë grumbulluar në zonën kufitare të Kuznica-Bruzgi duke jetuar në kampin e improvizuar në temperatura nën zero. Të paktën 11 emigrantë kanë humbur jetën deri tani, në të dyja anët e gardhit sipas raportimeve, teksa fluksi i njerëzve në vendndodhje ka nisur që prej verës. Një prej viktimave ishte një 19 vjeçar nga qyteti i Homs në Siri, i cili u varros të hënën. Pala bjelloruse dukej sot se detyronte emigrantët të kalonin në anën tjetër me anë të të çarave në gardhin kufitar, të cilave policia polake i përgjigjej me mjete tymuese. Një flotë mjetesh ujë-lëshuese janë thirrur në pikën kufitare ku kriza humanitare e njerëzve të bllokuar sa vjen e përkeqësohet. Një zëdhënës i rojeve kufitare polake tha për mediat: “Emigrantët në pikën kufitare të Bruzgi sulmuan sot rojet kufitare polake, ujë me presion u përdor kundër emigrantëve agresivë”.