Kryeministri i Polinisë, Mateus Moraviecki ka akuzuar sot Bashkimin Evropian për ‘shantazh’ gjatë një debati të nxehur me kryetaren e KE Ursula von der Leyen. Përplasja në Parlamentin Evropian erdhi pasi një gjykatë në Poloni ka refuzuar disa pjesë të ligjit themelor të BE. Zonja von der Leyen tha se do të veprojë për të parandaluar që Polonia të hedhë dyshime mbi vlerat e BE. Në reagimin e tij Moraëiecki refuzoi atë që quante "gjuhë kërcënuese" dhe akuzonte BE për tejkalim të kompetencave të veta. Qeveria e djathtë polake ka pasur shpesh kontradikta me unionin për çështje si të drejtat e grupeve LGBT dhe pavarësia gjyqësore. Debati i fundit vjen pas vendimit të paprecedentë të Gjykatës Kushtetuese të Polonisë që refuzoi parime themelore të Ligjit të BE mbi legjislacionet kombëtare të vendeve anëtare. Çështja e ngritur nga kryeministri polak, është e para e një vendi anëtar ku hidhen dyshime mbi traktatet e BE nga një gjykatë kushtetuese kombëtare. Sot Von der Leyen tha në Parlamentin Evropian se Komisioni Evropian, që është trupi ekzekutiv i BE, do të “vlerësojë me kujdes gjykimin”. Ajo shtoi: "Ky vendim hedh dyshime mbi themelet e Bashkimit Evropian dhe është një sfidë direkte ndaj unitetit të rendit ligjor evropian”.