Policia arrestoi dy të rinj në lidhje me ngjarjen e ndodhur një ditë më parë në zonën e Kombinatit, ku u qëllua me armë zjarri drejt një automjeti në lëvizje. Sipas njoftimit zyrtar të Policisë në sherr janë përfshirë 6 persona, ndërsa në pranga ka rënë Oltjon Asllani (i njohur edhe si Oltjon Vodollari), 28 vjeç. Ai është identifikuar si personi që ka qëlluar me armë drejt një automjeti në të cilin ndodheshin dy persona me të cilët kishte pasur një konflikt të mëparshëm. Bashkë me të është arrestuar edhe 30-vjeçari Serxho Bajza, i cili drejtonte automjetin nga ku Asllani ka qëlluar me armë zjarri. Pamjet e siguruara nga kamerat e sigurisë të vendosura në zonë kanë qenë vendimtare për identifikimin e autorëve. Në një prej videove, shihet momenti kur Oltjon Asllani del nga automjeti me një kallashnikov në dorë, duke shtuar panikun në zonë. Nga hetimet paraprake rezulton se konflikti ka nisur fillimisht me përplasje fizike mes dy të arrestuarve dhe katër personave të tjerë, të cilët janë identifikuar dhe janë vënë nën hetim në gjendje të lirë.