Muaji shtator po i vjen fundi, por plazhi i Durrësit vijon të frekuentohet nga pushues të shumtë. Vendas, bashkëkombës nga rajoni dhe diaspora, si dhe shtetas të huaj kanë zgjedhur bregdetin më të madh në vend për pushimet e vona, duke shfrytëzuar vjeshtën e ngrohtë. Në plazhin e madh të Durrësit dhe ujërat e qeta të Adriatikut, sheh familje që pushojnë, fëmijë që luajnë dhe turistë të huaj që shijojnë klimën mesdhetare përtej sezonit të zakonshëm veror. Për shumë prej tyre, kjo periudhë është edhe më e përshtatshme, pasi plazhi është më i qetë dhe deti më i pastër. “Vij nga San Francisko. Më pëlqen vjeshta. Koha është e mirë. Ka më pak mosha shkollore, më shumë qetësi dhe po kënaqemi shumë”, shprehet turistja nga San Francisko. “Shumë këndshëm. Erdhëm për të parë këtë vend kaq të bukur e me njerëz të mirë. Po e shijojmë kohën këtu”, thotë një turist nga Kina. “Erdhëm dje dhe është bukur. Deti fantastik. Hera e parë në Durrës”, shprehet për TCH, një turiste italiane. “Është vapë. E njëjta klimë si ne Itali. Jemi fqinj. Zgjodhëm shtatorin se tani i kemi pushimet. Në verë ishim në punë”, shton një tjetër turistë nga Italia. “Nga Kosova jemi. Vendi është i mirë, gjindja e mirë. Deti është i pastër”, shprehet shqiptarja nga Kosova. Operatorët turistikë thonë se numri i atyre që zgjedhin pushimet e vona po rritet çdo vit, duke zgjatur sezonin dhe duke sjellë përfitime shtesë për bizneset dhe ekonominë lokale.