Përmbytjet katastrofike të ditëve të fundit në Stamboll janë më të rëndat në më shumë se 80 vjet, deklaroi ministri i Brendshëm i Turqisë, ndërsa numri i viktimave arriti në katër. Stambolli, qyteti më i madh i Turqisë me 16 milionë banorë, u godit nga reshje shiu që, gjatë 48 orëve deri të enjten në mëngjes, tejkaluan mesataren e kombinuar të muajve shtator dhe tetor, raportoi “Associated Press”. Të premten, trupi i pajetë i një burri 66-vjeçar u gjet nën një urë në lagjen Sarier të Stambollit. Tri viktima të tjera ishin raportuar më herët, përfshirë një adoleshent që humbi jetën nga goditja elektrike gjatë stuhisë. Shtëpi dhe biznese u përmbytën, ndërsa uji mbuloi rrugë dhe parqe në të gjithë qytetin. Automjetet u morën nga rrjedha e ujit, ndërsa shumë prej tyre përfunduan të grumbulluara. Ministri bëri të ditur se ishin raportuar 9.850 raste të dëmeve dhe problemeve të tjera të lidhura me përmbytjet. Drejtoria e Përgjithshme e Meteorologjisë paralajmëroi për reshje “të dendura dhe intensive” në Stamboll dhe në katër provinca përreth gjatë fundjavës.