Ka pasur përplasje dhe momente tensioni mes policisë dhe disa protestuesve që po mblidheshin para Bashkisë së Stambollit për të protestuar kundër arrestimit të kryebashkiakut Ekrem Imamoglu, i akuzuar për korrupsion. Disa protestues donin të largoheshin nga zona për të marshuar drejt sheshit Taksim, por u ndaluan nga policia. Pas kësaj shpërthyen përleshjet dhe policia përdori shkopinj dhe gaz lotsjellës, raportojnë mediat lokale. Gjatë ditës ishin arrestuar 37 persona për ndarjen e postimeve të kryebashkiakut të Stambollit, Ekrem Imamoglu, që i kërkonte popullit të “Mbronte demokracinë”. Në një mesazh në X, Imamoglu tha se "grushti i shtetit të 19 marsit (data e arrestimit të tij) u krye kundër vullnetit të kombit". Kryebashkiaku konsiderohet rivali kryesor i presidentit Erdogan. Ky i fundit kritikoi të enjten opozitën për dështimin në adresimin e korrupsionit dhe skandaleve të diplomave, duke e akuzuar atë për mashtrim të publikut dhe shmangie të përgjegjësisë. Erdogan theksoi se Turqia është një vend që zgjohet çdo ditë me axhenda të reja, shumë prej të cilave fryhen artificialisht nga opozita, tha ai.