Mes deklaratave se stuhia ndaj Iranit tashmë është e pashmangshme, Donald Trump gjeti mundësinë të sulmonte edhe një herë aleatët, përfshirë Italinë. Gjatë një konference shtypi në Zyrën Ovale, një gazetare amerikane e pyeti: “Keni përmendur për mundësinë e tërheqjes së disa ushtarëve nga Gjermania. A do ta merrni në konsideratë të njëjtën gjë me Spanjën dhe Italinë?”. Përgjigja e Trumpit ishte “ndoshta edhe po, përse jo në fund të fundit. Italia nuk ka ndihmuar fare. Dhe Spanja ka qenë absolutisht e tmerrshme. Ndërkohë që janë në NATO”. I pakënaqur me faktin që Italia dhe aleatët europianë nuk e mbështetën fushatën e tij dhe të Izraelit kundër Republikës Islamike, Trump sipas analistëve, është duke përdorur qartazi kercenimin verbal dhe presionin publik si instrument për të detyruar vende të tjera të ndjekin linjën e tij. Presidenti amerikan ndryshoi qasjen ndaj kryeministres italiane Giorgia Meloni, duke e quajtur atë një lidere “të papranueshme”, duke nënvizuar se i mungon guximi për të mbështetur ndërhyrjen ushtarake amerikane në Iran. “Mendoja se ajo ishte një grua kurajoze, por gabohesha”, tha Trump në një intervistë telefonike për gazetën italiane “Corriere della Sera”, në një kohë kur më parë e kishte cilësuar si një “lidere të mirëfilltë botërore” dhe një grua “fantastike dhe plot energji”. Krisja e madhe erdhi në momentin kur shefi i Shtëpisë së Bardhë sulmoi Papa Leonin XIV, cka për shumë italianë konsiderohet një sakrilegj.