Partizani fiton trofeun e pare të sezonit, Superkupën e Shqipërisë, pasi mundi në finale Egnatian me shifrat 1-0. Dy skuadrat më në formë të momentit në Shqipëri diskutuan këtë trofe në ndeshjen e zhvilluar në “Arenën Komnbetare”. Kampionët e Shqipërisë dhe fituesit e Kupës së Shqipërisë zbritën në fushën e lojës me formacionet e tyre më të mira, teksa pjesa e parë foli më shumë për Partizanin, me Tedi Carën që provoi të gjente portën e rrogozhinasve në minutën e 13-të. Pak përpara fundit të pjesës së parë, në minutën e 38-të, nga një rivënie fundore, Alen Sherri që vetëm pak orë më parë fitoi çmimin “Portieri Vitit” gaboi rëndë duke i dhënë mundësinë ideale “Topit të Artë” të këtij viti, Arinaldo Rrrapajt, me këtë të fundit që dhuratën e shfrytëzoi maksimalisht dhe realizoi golin e avantazhit me portën e boshatisur. Pjesa e dytë nisi përsëri me ritmin që u mbyll fraksioni i parë, ndërsa këto 45 minuta folën diçka më shumë për skuadrën e Idlir Tetovës që provoi të gjente golin e barazimit në disa momente. Në minutën e 72-të, Fernando kishte mundësinë më të mirë për të gjetur golin e një penallti, por gaboi në ide me Pano Qirkon që kuptoi gjithçka. Në minutat e fundit, Lemine që erdhi nga stoli krijoi iluzionet e golit, por pa mundur që të gjejë rrjetën për rrogozhinasit. Në fund, pavarësisht dëshirës dhe përpjekjeve të Egnatias, që në këtë mbrëmje debutoi në finalen e Superkupë duke luajtur ndeshjen e parë në histori, rezultati nuk ndryshoi me Partizanin që koleksionon kështu për here të tretë në historinë e tij trofeun e Superkupës së Shqipërisë pas asaj të fituar në vitin 2004 përballë Tiranës dhe në vitin 2019-të përballë Kukësit.