Papa Leoni i XIV ka thënë se kontrolli i inteligjencës artificiale nuk duhet të mbetet në duart "e disa njerëzve", ndërsa ka paralajmëruar se teknologjia po nxit konflikte botërore, ide këto të paraqitura në dokumentin e parë të madh teologjik të pontifikatit të tij. Ato përfshijnë mbrojtjen e "madhështisë dalluese të njerëzimit" mes teknologjisë që ndryshon me shpejtësi, dhe po ashtu që përdorimi i AI-së në luftë t'i nënshtrohet "kufizimeve më të rrepta etike". Papa Leoni thekson se teoria e "Luftës së Drejtë", një doktrinë e krishterë që deklaron se cilat kushte e justifikojnë luftën, është "tani e vjetëruar", duke thënë se forca ushtarake mund të përdoret vetëm për "vetëmbrojtje në kuptimin më të rreptë". “Ndërtimi i një bote në një gjendje konflikti të përhershëm është një e keqe dhe duhet të emërtohet për atë që është”, shkruan Papa. Kundërshtimi i tij ndaj “Luftës së Drejtë” vjen pas vërejtjeve të zëvendëspresidentit të SHBA-së, JD Vance, që Papa “të jetë i kujdesshëm kur flet për çështje teologjike” pasi udhëheqësi shpirtëror katolik kritikoi ashpër sulmet e përbashkëta SHBA-Izrael ndaj Iranit dhe qortoi udhëheqësit botërorë për përdorimin e gjuhës fetare për të racionalizuar luftën. Papa Leoni këmbëngul se teknologjia duhet të mbrojë vendet e punës të njerëzve dhe duhet t'i nënshtrohet "kornizave të forta ligjore, mbikëqyrjes së pavarur, përdoruesve të informuar dhe një sistemi politik që nuk heq dorë nga përgjegjësia e tij".