Ekspertë të shumtë ushtarakë ndajnë të njëjtin mendim kur vjen fjala tek qyteti i rëndësishëm port ukrainas i Odesës. Ata mendojnë se zona, e kursyer deri më tani nga bombardimet dhe luftimet intensive, me shumë gjasë do të goditet nga forcat e Moskës duke pasur parasysh rëndësinë e saj strategjike dhe simbolike për Ukrainën. Më shumë se gjysma e importeve dhe eksporteve të Ukrainës kalojnë përmes këtij porti, i cili është njëkohësisht qyteti i fundit i madh mes forcave ruse që përparojnë drejt Khersonit në lindje dhe kufirit me Rumaninë anëtare të NATO-s në perëndim. Marrja e Odesës do t'i jepte Moskës kontrollin e të gjithë vijës bregdetare jugore, duke dobësuar rëndë Ukrainën - një objektiv ky të cilin disa strategë ushtarakë e kishin parashikuar në ditët e para të pushtimit, i cili filloi në 24 shkurt. Por BBC thotë se një sulm amfib i rusëve atje, pak shanse ka të ndodhë. Dr Sidharth Kaushal, studiues i fuqisë detare në institutin e ekspertëve të mbrojtjes Royal United Services Institute, mendon se sulmi nga uji i Rusisë do të ishte i vështirë e kjo për shkak se Moska ka aftësi të kufizuara në rajon. Një sulm i tillë, sipas tij, mund të funksiononte vetëm së bashku me një avancim tokësor. Por ndërkohë, trupat në tokë të Rusisë nuk kanë përparuar më, ndaj të paktën në periudhën afatshkurt, sipas Kaushal, një sulm amfib në këtë zonë duket i pamundur. Ai shton se Rusia mund ta përdorë forcën e saj detare si një lloj "mashtrimi", që t`i detyrojë ukrainasit të angazhojnë më kot një numër të madh trupash për mbrojtjen e Odesës, dhe të mos i dërgojnë në zona të tjera ku ka nevojë, si Mykolaivi.