Kombëtarja shqiptare e futbollit është gati të nisë një kapitull të ri nën drejtimin e teknikut italian, Rolando Maran. Ndeshja miqësore e së nesërmes kundër Izraelit do të jetë testi i parë për timonierin e ri të kuqezinjve, i cili do të bëjë debutimin e tij në stol. Në konferencën zyrtare për shtyp përpara këtij takimi, si trajneri Maran, ashtu edhe kapiteni Berat Gjimshiti, kanë folur për ndryshimet e para, filozofinë e re dhe vështirësitë e fillimit për të transmetuar idetë taktike te skuadra në një kohë relativisht të shkurtër. “Nuk është se po luajmë një ndeshje si PSG-Arsenal, por jemi te Shqipëria dhe duhet të përqendrohemi maksimalisht te kjo fanellë. Këto ditë të para kanë pasur dinamikën e tyre dhe duhet ta pranoj që ishte disi e vështirë të përkthejmë menjëherë në fushë gjithçka që përgatitëm në teori, por kam parë një grup me dëshirë të madhe për të mësuar.” Për të treguar këndvështrimin e grupit dhe përshtatjen me idetë e reja, përpara gazetarëve doli edhe lideri i prapavijës kuqezi, Berat Gjimshiti: “Nuk është asnjëherë normale apo e lehtë për një lojtar që të përballet me ndryshime të tilla të shpejta në kombëtare. Megjithatë, nuk duhet të flasim thjesht për një ‘filozofi italiane’ të përgjithshme, pasi edhe Maran ka idetë e veta specifike. Ne po mundohemi t’i kuptojmë sa më shpejt dhe t’i zbatojmë në lojë.” Përgatitjet për këtë sfidë tashmë kanë përfunduar për të dyja kampet. Krahas kuqezinjve, edhe përfaqësuesja e Izraelit ka zbritur në fushë mbrëmjen e sotme, ku ka zhvilluar stërvitjen e fundit zyrtare në tapetin e "Arenës Kombëtare", duke i dhënë dorën e fundit detajeve përpara përballjes miqësore me Shqipërinë.