Kombëtarja shqiptare e futbollit zbret në fushë për miqësoren e dytë dhe të fundit para nisjes së impenjimeve zyrtare në Ligën e Kombeve. Përballë kuqezinjve do të jetë Luksemburgu, në një 90-minutësh që shënon edhe ndeshjen e dytë në pankinë për trajnerin Rolando Maran, pas asaj humbjeje 0 me 1 ndaj Izraelit. Për teknikun italian, kjo përballje është thelbësore për të kolauduar skuadrën, teksa në konferencën për shtyp ai paralajmëroi ndryshime në formacion dhe kërkoi reagim pas sfidës së kaluar. "Do të ketë ndryshime, pasi ky test do të më shërbejë për të kuptuar më mirë karakteristikat e lojtarëve. E pamë të gjithë atë që nuk shkoi mirë në ndeshjen e fundit, ndaj tani na duhet më shumë vëmendje taktike, të mos lëmë hapësira dhe të kemi saktësi përpara portës." Në krah të trajnerit ishte edhe mbrojtësi Elseid Hysaj. Në prag të ndeshjes së tij të 100-të kuqezi, ai i ka dalë në mbrojtje repartit të avancuar, duke theksuar mbështetjen maksimale të ekipit për sulmuesit. "Lojtarë si Broja, Mehmeti, Daku apo të tjerët, duhet ta dinë se kanë mbështetjen tonë të plotë dhe nuk duhet të kenë presion. Me këtë modul të ri të trajnerit do të luajmë më në sulm, do të jemi më agresivë dhe jam i bindur se do të krijojmë më shumë raste."