Të qeshur, të rinj, me jetën përpara: Gazmend Ukali, 27 vjec nga Kërcova dhe e fejuara e tij, Albina Bellulli, 23 vjec nga Tetova udhëton drejt Stambollit për të festuar ditëlindjen e tij. Do të ishin tre ditë të gëzuara për ciftin e ri. Në kthim, i prisnin punët. Gazmendi ishte pjesë e zyrës së kryetarit të Komunës së Kërçovës, Fatmir Dehari dhe ish anëtar i Këshillit Rinor të kësaj komune. Të dy ata janë në mesin e viktimave që humbën jetën mes ferrit të flakëve që përfshiu autobusin, për të cilin padyshim, në asnjë cast nuk e menduan se nuk do t`i kthente të sigurtë në shtëpi. Një familje prej 4 anëtarësh thuhet të jetë shuar gjithashtu në aksidentin e kobshëm. Babai Avni Ahmeti, 36 vjeç, nëna Xhihan 35 vjeçe dhe djemtë e tyre, Alban e Luan Ahmeti, katër vjeç, nuk arritën dot të shpëtojnë. “Para derës së mesme të autobusit është një grua e djegur me dy fëmijë, me siguri binjakë. Hetuesit aktualisht janë duke kontrolluar për karburant shtesë, benzinë, sepse nafta është e vështirë të shpërthejë, dhe autobusi ishte me naftë”, thonë mediat bullgare. Një tjetër cift shqiptar sakaq, Lulzim Sulejlmani dhe Medina Lutfiu, te fejuar vetëm pak ditë më parë, janë në mesin e pasagjerëve të mbijetuar nga tragjedia shqiptare në Bullgari ku si pasojë e flakëve ndërruan jetë 45 persona, mes të cilëve edhe dy shoferët. Edhe ata kishin udhëtuar drejt Stambollit për të festuar bashkimin e tyre. Aktualisht, janë të shtruar në një spital në Sofje ku po marrin ndihmë mjekësore.