Një video është shfaqur në rrjet, pamjet e së cilës pretendohet se tregojnë forca ukrainase duke qëlluar e vrarë ushtarë rusë të kapur rob e të lidhur. New York Times më herët tha se e kishte provuar autenticitetin e videos, BBC po e verifikon. Filmimi, sipas saj, është kryer në një rrugë në perëndim të kryeqytetit ukrainas, Kiev, ku forcat ruse kanë qenë duke u tërhequr. Gjigandi mediatik thekson se në pamje shihen 4 persona me veshje ushtarake të shtrirë në tokë; njëri prej tyre i ka duart të lidhura pas shpine. Të tjerët nuk lëvizin, por ai duket se është ende gjallë- një ushtar ukrainas qëllon mbi të derisa resht së lëvizuri. Më pas, plani hapet e shihen dhe trupat e tjerë të shtrirë në tokë në një pellg gjaku, që të gjithë me uniforma ushtarake. Vetëm fytyra e njërës prej viktimave shihet, tre të tjerëve jo. Skenat në video duket se përputhen se imazhet e Google Street Vieë të zonës. Incidenti thuhet të ketë ndodhur në rrugën që lidh qytetin Dmytrivka me Irpinin e Buchan. Nuk dihet me siguri kur është filmuar videoja, thotë BBC, por pozicioni i hijeve në tokë tregon se ka qenë pasdite. Njëri prej ushtarëve ukrainas, që ka në krah një rrip me ngjyrat e flamurit, tipike për forcat e Kievit, përkulet mbi trupat dhe thotë: “Ja ku janë, mbrojtësit e ushtrisë ruse”. BBC thotë se kaq nuk mjafton për të dëshmuar identitetin e tyre, por pas përpjekjeve për një identifikim biometric të fytyrës së ushtarit, rezultoi se mund të bëhet fjalë për një gjeorgjian që ka lidhje të ngushta me Ukrainën.