Policia italiane nisi sot patrullimet rreth zonës së qendrës së konventave "La Nuvola", në përgatitjet e pritjes së liderëve të samitit të G20 në fundjavë. Liderët do të takohen në zonën historike të EUR në jug të Romës, zona e ndërtuar nga Benito Mussolini për lartësimin e regjimit të tij fashist. Samiti i ekonomive më të fuqishme të botës vjen mes një vale të gjerë grevash e protestash kundër pasaportës së detyruar të vaksinimit në Itali, e nisur në portin madhor të Triestes dhe e mbështetur nga shumë qytete të vendit. Takimet do të kryhen në qendrën futuristike të njohur si "Nuvola" (Reja), me një strukturë të varur brenda xhamit dhe kupolës së çeliktë. Akronimi i zonës EUR, do të thotë ‘Esposizione Universale Romana’, ose ndryshe Panairi Botëror i Romës, i krijuar në vitet 1930 si një ekzibicion e arkitekturës moderniste para panairit botëror të vitit 1942. Eventi do të kishte koinçiduar me përvjetorin e 20-të të regjimti fashist, por që nuk ndodhi kurrë prej nisjes së Luftës së Dytë Botërore. Konflikti detyroi arkitektët e Mussolini-t të linin të pambaruar rreth gjysmën e zonës EUR.