Dhjetë persona kanë dalë në gjyq në Paris të akuzuar për ngacmim online të Brigitte Macron. Kjo është faza e fundit e një beteje ligjore në të dyja anët e Atlantikut kundër pretendimit të rremë se zonja e parë franceze është një burrë me emrin Jean-Michel Trogneux (Mishel Tronje). Presidenti, Emmanuel Macron dhe gruaja e tij ngritën një padi për shpifje në SHBA në fund të korrikut, në lidhje me një thashethem të amplifikuar dhe të përsëritur në internet se Brigitte Macron kishte lindur burrë. Padia amerikane e familjes Macron sulmoi atë që e quajti "gënjeshtra të verifikueshme dhe shkatërruese" që përsëriten në internet nga podkasterja e krahut të djathtë Candace Owens (Kandis Ouens) se Brigitte Macron, 72 vjeç, ka lindur mashkull. Padia amerikane tha se provat e hodhën poshtë qartë këtë "narrativë groteske", e cila ishte shndërruar në "një fushatë poshtërimi global" dhe "ngacmimi të pamëshirshëm në shkallë botërore".