Një helikopter i Marinës Amerikane dhe një avion luftarak u rrëzuan veçmas në Detin e Kinës Jugore brenda një ore gjatë operacioneve rutinë të kryera nga e njëjta aeroplanmbajtëse të dielën, tha Marina Amerikane, duke shtuar se i gjithë personeli ishte i sigurt. Incidentet ndodhën ndërsa Presidenti Donald Trump është në një vizitë në Azi. Duke folur me gazetarët në bordin e Air Force One të hënën, Trump tha se rrëzimet ishin të pazakonta dhe mund të kenë ndodhur për shkak të "karburantit të keq", duke shtuar se shkaku sidoqoftë do të mësohet shpejt. Flota amerikane e Paqësorit në një postim në X, tha: "I gjithë personeli i përfshirë është i sigurt dhe në gjendje të qëndrueshme. Shkaku i të dy incidenteve është aktualisht nën hetim." Flota amerikane e paqësorit nuk zbuloi ndërkohë vendndodhjen e aeroplanmbajtëses USS Nimitz, nga e cila si helikopteri ashtu edhe avioni po kryenin operacione rutinë. Ministria e jashtme e Kinës i ofroi ndihmë humanitare Shteteve të Bashkuara pas incidenteve, tha zëdhënësi Guo Jiakun në një konferencë për shtyp të hënën. Një helikopter Sea Haëk u rrëzua rreth orës 14:45. të së dielës dhe pak më vonë, një avion luftarak F/A-18F Super Hornet u rrëzua gjithashtu në Detin e Kinës Jugore, tha Marina. F/A-18 është të paktën i katërti nga avionët luftarakë që kushtojnë mbi 60 milionë dollarë që Marina ka humbur këtë vit. Marina humbi dy F/A-18 të tjerë në Detin e Kuq gjatë pranverës, njëri ra në det nga një aeroplanmbajtëse dhe tjetri kishte një problem me sistemin e uljes.