Mes valëve të perëndimit në detin Mesdhe, peshkatari palestinez Mohammed al-Nahal drejton një grup barkash të vjetra në një tjetër natë gjuetie të rrezikshme mes bllokadës së Izrelit. Kufizimet për barkat me motorë e detyrojnë të qëndrojë pranë bregut, duke u përpjekur të mbledhë peshk në ujërat e zbrazura nga mbipeshkimi. "Nëse kapim 200 kilogramë sardele, do të ishte shumë mirë, por mund të kthehemi edhe duarbosh”, thotë ai. "Sa më larg të shkojnë aq më shumë do të harxhojmë për karburant, pa garanci për peshk të kapur”, thotë Nahal, në krye të pesë barkave të peshkimit. Gaza është e kufizuar nga Egjipti në jug dhe Izraeli në Veri. Grupi islamist Hamas qeveris zonën prej vitit 2007, dhe deti i hapur ofron premtimin e lirisë. Marina izraelite kontrollon tërësisht bregdetin e Gazes prej 40-kilometrash dhe rregullisht zgjeron ose shkurton zonën e lejuar të peshkimit, në varësi të kushteve të sigurisë. Pas disa muajsh qetësie relative pas konfliktit 11-ditor në maj, zona e peshkimit është zgjeruar aktualisht në maksimumin e saj për kohën e bllokadës.