Për t’i shpëtuar luftës, ukrainasit po përdorin ç’të mudnin, si rasti i këtij treni të kthyer edhe në një spital të lëvizshëm. Një ndër pasagjerët e trenit që largohet me shpejtësi nga vija e frontit në Ukrainën e shkatërruar nga lufta, elektricisti Evhen Perepelytsiapo po merr mjekim nga një infermiere nga Mjekët pa Kufij (MSF). Ai është në mesin e 48 pacientëve të plagosur që do të evakuohen nga Ukraina lindore në qytetin perëndimor të Lviv dhe është mirënjohës që së shpejti do të shohë përsëri fëmijët e tij pasi pothuajse humbi jetën. "Shpresojmë që më e keqja të ketë mbaruar -- që pas asaj që kam kaluar, do të jetë më mirë," tha 30-vjeçari, i shtrirë në një krevat në një nga vagonët e trenit të mbështjellë në një batanije gri. Ky operacion evakuimi ishte i pari nga lindja që kur një sulm rus vrau 52 njerëz mes mijërave që prisnin trenin në stacionin hekurudhor lindor të Kramatorsk të premten. Dhe ishte i katërti që organizohej nga shoqata Mjekët pa Kufij (MSF) që kur Rusia pushtoi Ukrainën më 24 shkurt. Perepelytsya tregoi se si humbi këmbën nga bombardimet në qytetin e tij të lindjes, Hirske, në rajonin lindor të Luhansk.