Dubai i ka dhënë lamtumirën panairit ekstravagant Expo 2020, duke lënë qytetin e vogël miliarder të shkretëtirës, në pritje të eventeve të ardhshme. Gjashtë muaj pas hapjes së impjantit të posaçëm prej $7 miliardësh, ceremonia e mbylljes në kupolën Al Vasl u shoqërua me fishekzjarre dhe muzikë nga Christina Aguilera, Nora Jones e violinçelistja Jo-Jo Ma. Miliona njerëz vizituan 192 pavjonet ditët e fundit, aq sa në qytet me vështirësi arrije të gjeje një taksi. Megjithë temperaturat 30 gradë Celsius radhë të gjata formoheshin në atraksionet kryesore si pavjoni i Emirateve të Bashkuara Arabe apo Ndërtesa e Arabisë Saudite. "Ishte një eksperiencë e bukur, shumë impresionuese," thotë 66 vjeçari Abbas Masud, ish-bankier nga Pakistani. "Vizitova 172 pavjone. Desha t’i vizitoja të gjitha 192 kompartimentet por nuk arrita dot", shton ai. Panairi madhor u zhvillua në një impjant rrethor me masë gati dy herë sa qyteti i Monacos. Eventi ishte një pikë krenarie për monarkët e Dubai të cilët kërkonin të tërhiqnin vëmendjen e botës me projektet inovative.