Lionel Messi ka marrë vendimin për t’u tërhequr nga Kombëtarja e Argjentinës. Pas më shumë se dy dekadash me fanellën “Bardhe e kaltër”, ylli argjentinas ka konfirmuar se kapitulli i tij me përfaqësuesen ka ardhur drejt fundit. Messi e ka bërë të ditur vendimin përmes një mesazhi emocional, duke e cilësuar si një zgjedhje të dhimbshme, por të marrë në momentin e duhur. “Pas gjithë kësaj kohe që nga finalja dhe pasi e kam menduar shumë, dua t’ju njoftoj të gjithëve se po tërhiqem nga Kombëtarja”, shkruan Messi. Ai thekson se gjatë gjithë karrierës së tij me Argjentinën ka dhënë gjithçka për fanellën e vendit të tij, si në momentet e suksesit, ashtu edhe në periudhat më të vështira. “Nuk ka mbetur shumë kohë dhe kapituj të ndryshëm po mbyllen. E dua, e kam dashur dhe do ta dua gjithmonë të qenit pjesë e Kombëtares. Kam dhënë gjithçka që kisha dhe nuk kam më shumë për të dhënë”, shprehet ai. Kapiteni i Argjentinës vlerëson edhe brezin e ri të lojtarëve që po vjen dhe që, sipas tij, meriton hapësirën në përfaqësuese. “Tani do të jem një prej jush” Messi ka falënderuar tifozët për mbështetjen gjatë 20 viteve me Kombëtaren. “Faleminderit për gjithë dashurinë gjatë këtyre 20 viteve. Do të më mungojë t’ju dëgjoj nga brenda. Tani do të jem një prej jush, gjithmonë duke mbështetur nga jashtë, në momentet e mira dhe akoma më shumë në ato të këqija.” Ai ka falënderuar gjithashtu familjen, trajnerët dhe shokët e skuadrës për rrugëtimin e përbashkët. Messi largohet me krenari për arritjet me Argjentinën, veçanërisht për trofetë e fituar në vitet e fundit. “Largohem i qetë dhe krenar, duke e ditur se së bashku me shokët e skuadrës ju dhamë momente që dikur i kishim ëndërruar. Ju dua!” Në fund, ai ka falënderuar edhe Zotin për mundësinë që i dha të lindte argjentinas: “Faleminderit Zotit që më bëri argjentinas. Vamos Argentina!” Messi zbuloi se vendimin e kishte shkruar më 21 korrik, vetëm dy ditë pas finales, ndërsa pas një ngjarjeje familjare të dhimbshme tha se ishte edhe më i bindur për zgjedhjen e tij. Pas 20 vitesh me Kombëtaren, një prej kapitujve më të mëdhenj në historinë e futbollit duket se po shkon drejt fundit.