Flet trajneri I kombëtares Në prag të grumbullimit të parë zyrtar, Rolando Maran tregon kuqezinjtë e tij Rolando Maran nuk e fsheh se Shqipëria e nis aventurën zyrtare në Nations League mes disa vështirësive. Ndryshimet e shumta në skuadrat e lojtarëve, futbollistët që ende nuk kanë gjetur ekip dhe mungesa e minutave për disa prej tyre janë një realitet që trajneri italian e pranon, por nuk dëshiron ta shohë si justifikim. Përkundrazi, Maran thotë se këto vështirësi duhet ta bëjnë Kombëtaren edhe më të fortë. “Nuk kam frikë nga vështirësitë. Ato duhet të jenë një stimul për të bërë akoma më shumë. Nëse i përdorim si alibi, jo. Kur kalon vështirësitë, ndihesh më i fortë” Pas dy miqësoreve të qershorit, Maran ka pasur kohë për të njohur më mirë grupin dhe për të ndjekur nga afër lojtarët shqiptarë. Tani, me nisjen e kampionateve, ai ka programuar një tjetër tur intensiv në Europë, me rreth shtatë vende në vetëm 14 ditë. Synimi është i qartë, të shohë lojtarët në ndeshje që vlejnë dhe të krijojë një panoramë sa më të plotë përpara grumbullimeve të ardhshme. Një nga shqetësimet kryesore të trajnerit është aktivizimi i lojtarëve në klubet e tyre.