Presidenti francez Emmanuel Macron tha sot në samitin e BE mbi krizën energjitike se vendimi për të dhënë 100 euro kompensim 38 milionë francezëve është hapi i më drejtë. Në fjalën e tij ai preku gjithashtu çështjen e përplasjeve me Poloninë dhe emigracionin. ‘’Manipulimi i TVSh-së nuk është i mundur sipas ligjit evropian prandaj besoj se vendimii qeverisë franceze për kompensimin është i drejtë dhe i shënjestruar ndaj problemit”, tha ai. Macron gjithashtu këshilloi Poloninë të bëjë hapa konkrete për zgjidhjen e konfliktit për legjislacionin e BE, për vendimit të kontestuar të gjykatës së Varshavës. "Të gjitha shtetet anëtare duhet të respektojnë rendin ligjor. Prandaj me dialog duhet të punojmë për zgjidhjen e çështjes së Polonisë.” “Kjo e fundit duhet të ndërmarrë hapa konkretë për të evituar ushtrimin e mjeteve të presionit që ne kemi në dispozicion, për t’u siguruar që ligji të respektohet”. “Kryeministri polak shprehu qartë mbrëmë vullnetin e tij për nisjen e punës dhe përgjigjen e pyetjeve të bëra”. Në lidhje me emigracionin Macron tha: "Nevojitet koordinim për mbrojtjen e kufijve. Me sa kuptoj emigrantët po vijnë nga ajri e nga deti prandaj muret kufitare nuk mjaftojnë”. “Nevojitet dialog me vendet tranzite dhe ato të origjinës për parandalimin e fluksit”.