I dërguari i Bashkimit Europian për dialogun Kosovë – Serbi, Mirosllav Lajçak, befasi me deklaratën e tij të fundit se pretendimet që BE-ja është kundër hapjes së urës kryesore mbi lumin Ibër, janë corientuese. Teksa pak ditë më parë, zëdhënësi i bllokut Peter Stano paralajmëroi shtimin e masave ndëshkuese ndaj Kosovës në rast se Prishtina zyrtare, sic tha ai, vazhdon me veprime të njëanshme e të pa bashkërenduara në veriun e banuar me shumicë serbe, Lajcak insiston se Brukseli nuk ka ndryshuar pozicion mbi këtë temë, por thjesht sipas tij, marrja e një vendimi kundër vullnetit të njerëzve të prekur, nuk kontribuon në normalizim marrëdhëniesh. “Qeverisja e mirë e kupton ndjeshmërinë e minoriteteve”, ishte komenti i zyrtarit të lartë europian, i cili theksoi se çështja e zbatimit të marrëveshjes për urën do të diskutohet në takimin e radhës në Bruksel, por pa përmendur ndonjë datë. Ura - që ndan Mitrovicën Jugore me shumicë shqiptare me Mitrovicën Veriore me shumicë serbe - është e hapur aktualisht për këmbësorët, por jo për automjetet. Më herët, ambasadori amerikan në Kosovë, Jeffrey Hovenier, deklaroi se hapja e urës në këtë kohë rrezikon ushtarët amerikanë, ndaj kjo nuk duhet të ndodhë. Misioni i NATO-s në Kosovë, KFOR gjithashtu ka paralajmëruar se nuk do të hezitojë të veprojë për t’iu përgjigjur zhvillimeve të lidhura me sigurinë, dhe thote se cdo vendim për urën duhet të merret përmes dialogut Kosovë-Serbi, të ndërmjetësuar nga dialogu në Bruksel.