Mbi 30 vite në shërbim të qytetarëve, vritet nga një qytetar brenda sallës së gjyqit. Gjyqtari 62-vjeçar Astrit Kalaja, që u qëllua për vdekje në krye të detyrës, gjatë një procesi gjyqësor brenda Gjykatës së Apelit në Tiranë, shërbeu për më shumë se tri dekada në sistemin e drejtësisë. Astrit Kalaja ka lindur në qytetin e Shkodrës dhe u diplomua në vitin 1993 në Fakultetin e Drejtësisë. Sapo mbaroi studimet, në nëntor 1993-shit, ai nisi karrierën e tij në sistemin e drejtësisë, ku shërbeu për shumë vite si gjyqtar në Gjykatën e Rrethit Shkodër, për të vijuar më pas në Gjykatën e Apelit Shkodër. Ndërsa vitet e fundit, ai ushtronte detyrën e anëtarit të gjykatës së Apelit të Juridiksionit të Përgjithshëm në Tiranë, ndërsa ishte anëtar i zgjedhur për të tretën herë në Kolegjin Zgjedhor. Në vitin 2019, gjyqtari Kalaja kishte kaluar me sukses procesin e Vettingut, duke vijuar të ushtrojë profesionin e gjyqtarit brenda sistemit të drejtësisë. Magjistrati Astrit Kalaja ishte baba i dy fëmijëve, një vajze dhe një djali, dhe së fundi ishte bërë edhe gjysh.