Bashkimi Evropian dhe Shtetet e Bashkuara të Amerikës po tregohen shumë të buta ndaj Serbisë, u shpreh Albin Kurti për Financial Times. Në intervistën e dhënë medias prestigjoze, kryeministri i Kosovës theksoi se në këndvështrimin e tij, nuk është ky qëndrimi që duhet mbajtur me Beogradin. Përkundrazi, Serbisë, sipas Kurtit, i duhet dhënë një ultimatum për të vendosur sanksione ndaj Rusisë dhe të detyrohet të rreshtohet në krah të Perëndimit për t’i ofruar Kosovës siguri në procesin e normalizimit të marrëdhënieve. “ Në momentin që Serbia i vendos sanksione Federatës Ruse, atëherë ajo mund të tregojë se e do vërtet integrimin në BE dhe se Serbia pa Rusinë nuk mund ta kërcënojë sigurinë e kontinentit. Atëherë do të mund të besoja se në thelb, serbët duan paqe. Dhe SHBA-ja e BE-ja nuk do të përpiqeshin që t’i qetësonin më”, ishte komenti i Kurtit. Ai nënvizoi se Serbia duhet të tregojë përkushtim ndaj integrimit në BE dhe t`i japë fund përpjekjeve për t’u ulur në “tre ose katër stola”. Nga ana tjetër, Kurti refuzoi të tregonte nëse Policia e Kosovës do t’i tërheqë njësitë speciale nga veriu, megjithatë sipas tij, ankesat e serbëve ndaj pranisë së tyre kanë ardhur në rënie. Javën që shkoi, policia e Kosovës bastisi disa degë të një banke serbe në veri të vendit dhe konfiskoi paratë serbe atje.Me hyrjen në fuqi të rregullores së re të Bankës Qendrore të Kosovës, monedha e ligjshme për transaksionet në kesh është euro, ndërkohë që komuniteti serb në Kosovë përdorte edhe dinarin (RSD), monedhën zyrtare të Serbisë.