Kryeministri i Groenlandës iu përgjigj deklaratave të presidentit amerikan Donald Trump, duke hedhur poshtë çdo interes të mundshëm të SHBA-së në ishull. “Groenlanda u përket groenlandezëve”, theksoi Egde në një postim në Facebook, duke i dërguar një mesazh të qartë Uashingtonit. “Ne nuk jemi amerikanë, nuk jemi danezë, sepse jemi groenlandezë. Kjo është diçka që amerikanët dhe udhëheqësit e tyre duhet ta kuptojnë”, tha ai. Kryeministri groenlandez gjithashtu theksoi se “ne nuk jemi në shitje dhe askush nuk mund të na blejë“. Në mbyllje, ai theksoi se “e ardhmja e vendit do të përcaktohet nga ne”. Kujtojmë se Groenlanda po përgatitet për zgjedhjet javën e ardhshme, më 11 mars. Trump shprehu interesim për blerjen e ishullit - me vetëm 57.000 banorë - nga Danimarka qysh në vitin 2019, por u refuzua. Groenlanda, pjesë e NATO-s përmes anëtarësisë së Danimarkës, ka rëndësi strategjike për ushtrinë amerikane dhe për sistemin e saj të paralajmërimit të hershëm për raketa balistike, pasi rruga më e shkurtër nga Evropa në Amerikën e Veriut kalon përmes ishullit Arktik.