Një anije kroçerë me turistë gjermanë është ankoruar sot në portin spanjoll të Malaga, e para prej më shumë se një vit, sipas zyrtarëve. më 7 qershor ministria spanjolle e transporteve ka hequr kufizimet për kroçerat ndërkombëtare, të vendosura që prej nisjes së pandemisë së koronavirusit në mars 2020. “Pas 15 muajsh në të cilat portet tona qëndruan të mbyllura, ne tashmë jemi të përkushtuar të të mirëpresim kroçerat me turistë për ta bërë sa më të bukur eksperiencën e pasagjerëve”, tha Carlos Rubio, kreu i autoritetit të portit të Malaga. Ai shtoi se zbritja e vizitorëve po organizohej në grupe, për të siguruar respektimin e masave shëndetësore. “Me kroçerat e para ekskursionet do të bëhen në grupe, njerëzit mund të shëtisin lirshëm. Por brenda disa muajve, gjërat do të kthehen në normalitet”, shtoi ai.