Departamenti amerikan i Energjisë njoftoi se 53.3 milionë fuçi naftë nga Rezervat Strategjike të SHBA-së do t`u jepen për përdorim kompanive energjetike, në kuadër të përpjekjeve ndërkombëtare për të ulur presionin mbi çmimet e naftës pas konfliktit me Iranin. Një lëvizje e tillë shihet si pjesë e angazhimit të Uashingtonit për të hedhur në treg gjithsej 172 milionë fuçi naftë. Iniciativa u prezantua në mars nga Agjencia Ndërkombëtare e Energjisë në bashkëpunim me më shumë se 30 shtete, me synimin për të shtuar rreth 400 milionë fuçi në tregun global. Tensionet u përshkallëzuan pasi Irani mbylli Ngushticën e Hormuzit, një nga korridoret më të rëndësishme energjetike në botë, përmes së cilës përpara luftës kalonte rreth 20 për qind e furnizimit global me naftë dhe gaz natyror. Kjo situatë solli një shtim të rrufeshëm të kuotimit të naftës dhe ka rritur trysninë e inflacionit në ekonominë botërore. Sipas të dhënave të fundit, çmimi i naftës bruto është rritur me afro 45 për qind, ose rreth 30 dollarë për fuçi, që nga fillimi i luftës.SPR konsiderohet rezerva më e madhe emergjente e naftës bruto në botë dhe administrohet nga qeveria federale amerikane që prej vitit 1975, për të mbrojtur ekonominë nga krizat e furnizimit me energji. Ndërkohë, disa prodhues të mëdhenj si Arabia Saudite dhe Emiratet e Bashkuara Arabe kanë arritur të gjejnë rrugë alternative eksporti, por analistët vlerësojnë se ende 10 deri në 12 milionë fuçi naftë në ditë mbeten jashtë tregut global.