Një person me shtetësi të dyfishtë britanike dhe iraniane, i arrestuar nën dyshimin për përgatitje të akteve terroriste në bazën ajrore RAF Fairford, është liruar me kusht nga policia e antiterrorit. 25-vjeçari u prangos në lagjen Westminster të Londrës të enjten, ndërsa kontrollet e imtësishme në dy prona të kanë përfunduar, duke lënë hetimet të hapura për të zbardhur atë që dyshohet si një komplot i mbështetur nga jashtë.Alarmi i sigurisë shpërtheu fundjavën e kaluar pranë bazës qw pwrdoret nga Forcat Ajrore të SHBA-së (USAF). Policia evakuoi dhjetëra shtëpi pasi u njoftua për tre "automjete të dyshimta" që po udhëtonin drejt bazës ushtarake. Sipas të dhënave që disponon BBC, një fermer vendas njoftoi policinë pasi pikasi një grup burrash të maskuar pranë mjeteve. Pesë të rinj britanikë nga Londra, të moshës 23 deri në 25 vjeç, u arrestuan në vendngjarje nën akuzën për vepra penale me eksplozivë dhe më pas për terrorizëm. Të pestë janë liruar gjithashtu me kusht. Ngjarja ka mbledhur me urgjencë Komitetin e Krizave të qeverisë britanike. Kryeministri Andy Burnham, i cili kryesoi takimin, deklaroi publikisht se ekzistojnë "indikacione të forta" se Irani ka luajtur një rol direkt në këtë incident. Këtë qëndrim e përkrah edhe Uashingtoni zyrtar; Sekretari amerikan i Shtetit, Marco Rubio, deklaroi në rrjetin Fox News se situata është jashtëzakonisht serioze dhe përfshin qartësisht duart e një aktori të huaj. Baza e RAF Fairford ka shërbyer muajt e fundit si pikënisje për bombarduesit amerikanë që kryejnë sulme mbrojtëse në Lindjen e Mesme, pasi qeveria britanike aprovoi përdorimin e saj. Ky aktivitet kishte sjellë më parë kërcënime zyrtare nga Teherani, i cili paralajmëroi në korrik se çdo bazë që përdoret kundër territorit të tij do të konsiderohet "objektive legjitim".Nga ana tjetër, Ambasada e Iranit në Londër ka reaguar ashpër, duke hedhur poshtë akuzat dhe duke i cilësuar ato si "spekulime keqdashëse dhe të pabaza" të koordinuara nga shteti britanik. Hetimet e antiterrorit britanik po vijojnë në mënyrë komplekse për të dokumentuar të gjitha lidhjet e mundshme të të dyshuarve.