Misioni paqeruajtës i KFOR-it, në Kosovë, njoftoi se disa makina dhe pajisje ushtarake do të hyjnë nga kufiri me Maqedoninë e Veriut dhe do të vazhdojnë nga Fushë Kosova drejt kampit në Novo Selo. KFOR kërkoi që drejtuesit e automjeteve në rrugë të cilët mund t`iu afrohen autokolonave të tregojnë kujdesin e duhur dhe respektimin e rregullave. Mjetet e rënda ushtarake do të udhëhiqen nga batalioni hungarez dhe ato do të kontribuojnë për një mjedis më të sigurt në vend, thuhet në njoftim. Automjetet dhe pajisjet ushtarake, duke përfshirë transportuesit e personelit të blinduar, do të hyjnë në Kosovë nga kufiri i Maqedonisë së Veriut dhe do të lëvizin drejt kampit të Novo Selo-s në data nga 21 deri në 26 dhjetor. Gjatë vitit të ardhshëm batalioni i parë i njësive rezervë do të sigurohet nga Hungaria duke siguruar një gatishmëri shumë të lartë për KFOR-in që do të ruajë një mjedis të sigurt dhe lirinë e lëvizjes në Kosovë, vazhdon raporti. Gjeneralmajori hungarez, Ferenc Kajari që mori në tetor detyrën e komandantit të misionit të KFOR-it, e përshkroi atësi misionin “më të gjatë dhe më të suksesshëm” të Aleancës Veri-Atlantike.