Televizioni irainian publikoi sot pamjet e aksionit ku forcat e Gardës Revolucionare merrnin kontrollin e një transportueseje në Detin e Omanit, pas tentativës së sekuestrimit nga marina e SHBA. Në raportimin e televizionit iranian thuhej se incidenti detar ka ndodhur rreth një javë më parë. Sekuenca e ngjarjeve përshkruante një tentativë të dështuar të marinës së SHBA për sekuestrim të transportueses me naftë iraniane. Garda Revolucionare iraniane tha se SHBA kishte sekuestruar transportuesen dhe kishte transferuar ngarkesën e saj në një transportuese tjetër. Forcat detare iranaine kishin marrë kontrollin edhe të transportueses së dytë, duke bërë të dështojë një tjetër tentativë e SHBA për kapjen e saj, sipas Teheranit. Në raportim thuhej se “amerikanët ishin larguar nga zona” dhe se transportuesja ishte ankoruar në portin Bandar Abas në mëngjesin e 25 tetorit. Garda Revolucionare nuk specifikonte për cilat mjete detare bëhej fjalë. Zhvillimet vijnë mes disa incidenteve të mjeteve detare me karburante mes Iranit, SHBA dhe Izraelit. Ringjallja e marrëveshjes ndërkombëtare bërthamore të Iranit do të sillte heqjen e sanksioneve ekonomike të vendosura nga SHBA, por përpjekjet ende nuk po arrijnë sukses.