Grupe protestuesish pro-Iran u përleshën sot me forcat e sigurisë në kryeqytetin Bagdad, duke shprehur zemërimin për rezultatn e zgjedhjeve të javës që shkoi. Grupimi pro-iranian në vend Hashed al-Shaabi humbi ndjeshëm në zgjedhjet parlamentare gjë që mbështetësit e denonconin si “manipulim”. Grupet e mbledhura për lutjet e së premtes u përleshën me forcat e policisë, dhe autoritetet raportonin për më shumë se 100 të palgosur. "Kishte 125 të plagosur, 27 prej tyre civilë dhe pjesa tjetër nga forcat e sigurisë”, tha ministria e shëndetësisë. Demonstruesit kishin qëlluar me objekte të forta dhe bllokuan hyrjen në “Zonën e Gjelbër” siç i referohen vendasit zonës së ambasadave të huaja. Dëshmitarët thanë se policia kishte qëlluar në ajër ndërsa rrjetet pro-iraniane thanë se efektivët kishin qëlluar ndaj protestuesve. Kryeministri Mustafa al-Kadhemi ka urdhëruar një hetim të plotë për ngjarjet e së premtes, tha sot zyra e tij.