Zbardhen të tjera detaje nga vrasja e 30-vjeçarit Kristian Marku, mbrëmjen e të hënës në Vlorë. Policia vijon të mbledhë prova në terren, ku fokusi është përqendruar te zbulimi i personit që ka vjedhur targën e mjetit, që u përdor në atentat. Mësohet se targa i përket një polici, i cili e kishte lënë mjetin të parkuar në Novoselë. Burime nga Policia e Vlorës bëjnë me dije se targa ka rezultuar e vjedhur ditën e vrasjes. Ndërkohë, blutë e qytetit bregdetar po mbledhin kamerat në Njësinë Novoselë, gjë që mund të ndihmojë në identifikimin e personit që vodhi targën në makinën e efektivit. Nga ana tjetër, celulari i viktimës nuk është arritur të hapet nga ekspertët në Vlorë, ndaj është dërguar në Tiranë për veprime të hollësishme, për të kuptuar se pse 30-vjeçari nga Rrësheni ndodhej në Vlorë, kur ju bë atentati. Kristian Marku po udhëtonte i vetëm dhe në mjetin e tij nuk është gjetur asgjë e paligjshme.