Autoriteti i Konkurrencës i ka bërë thirrje qytetarëve që duan të paraqesin ankesat e tyre ndaj kompanive të shërbimeve celulare në vend që ti adresohen këtij institucioni. Në një njoftim për mediat Autoriteti ka bërë të ditur se ka nisur një hetim për periudhën nga 1 janari 2022 deri në 25 korrik 2025. “Ky hetim synon të mbrojë interesat e konsumatorëve shqiptarë, duke garantuar një treg sa më të lirë dhe konkurrent, ku secili përdorues të ketë mundësinë të zgjedhë shërbimin që i përshtatet më shumë, me cilësi dhe me çmime të drejta”, thuhet në njoftimin e Autoritetit të Konkurrencës. Ndërkohë që bëhet e ditur se hetimi përfshin edhe dy kompanitë Vodafone Albania SHA dhe One Albania SHA, ai është ende në fazën paraprake dhe kjo nuk nënkupton se dy kompanitë janë kapur në shkelje të ligjit.