Katër shqiptarët që u kapën gjatë një tentative për të grabitur në një “shtëpi bari” në Londër janë dënuar me burg. Denis Loka, 22 vjeç, Kristo Pocaj, 31 vjeç, Kreshnik Xhaferi, 41 vjeç dhe Marsel Tushollari, 42 vjeç, u deklaruan fajtorë për vjedhjen e një shtëpie të pabanuar. Loka, Tushollari dhe Xhaferi u dënuan me 15 muaj burgim, ndërsa Pocaj, i vetmi që është dënuar edhe më herët për trafik droge, u dënua me 21 muaj burgim. Autorët udhëtuan drejt Gateshead në orët e para të 29 nëntorit të vitit të kaluar për të grabitur një banesë, por fqinjët i pikasën dhe njoftuan policinë. Oficerët mbërritën në vendngjarje dhe hynë në ambientet për të gjetur të pandehurit dhe zbuluan gjithashtu se banesa po përdorej si fermë kanabisi. Tri nga dhomat po përdoreshin për të rritur bimë, ku u gjetën qindra bimë në faza të ndryshme të kultivimit.