Takimi mes Donald Trump dhe Vladimir Putin u prit me vëmendje të madhe nga mediat dhe analistët, dhe jo më pak nga ekspertët e gjuhës së trupit. Pavarësisht se skena e parë la përshtypjen e një klime pozitive dhe të relaksuar, vëzhguesit vunë re se pas buzëqeshjeve dhe përshëndetjeve fshihej një dozë e qartë tensioni, si një sfidë mes dy personaliteteve të forta që po matin terrenin. “Trump u shfaq i buzëqeshur dhe i qetë, por qetësia e tij mbante nuancat e një njeriu që është i vetëdijshëm për peshën e momentit,” vlerëson ekspertja e komunikimit joverbal, Patty Ann Wood. “Qëndrimi i tij ishte i drejtë, supet e hapura dhe buzëqeshja, ajo karakteristikja e tij e vogël dhe e tërhequr – sinjalizonte vetëbesim, por edhe përgatitje për një skenë ku çdo gjest ka peshë.” Ndërkohë, Judi James, një tjetër specialiste e analizës së gjuhës trupore, e krahasoi sjelljen e Trump me atë të një prezantuesi talk-show: “Ai e përshëndeti Putinin me ngrohtësi, thuajse si një mik të ftuar në skenë, por menjëherë pas uljes, filloi të kërkonte kontroll mbi situatën, një ndryshim i menjëhershëm në dinamikë.”