Sulmi i Rusisë dhe pushtimi i disa territoreve në Ukrainë ka ndryshuar thellësisht mendimin në Gjermani. Ushtria gjermane kohët e fundit po këmbëngul për një rritje masive të investimeve pasi Parlamenti votoi për të përjashtuar shpenzimet e mbrojtjes nga rregullat strikte të borxhit. Gjenerali i lartë i vendit, Carsten Breuer, i ka thënë BBC-së se rritja e buxhetit është urgjentisht e nevojshme, sepse ai beson se agresioni rus nuk do të ndalet në Ukrainë. "Ne jemi të kërcënuar nga Rusia. Jemi të kërcënuar nga Putin. Duhet të bëjmë gjithçka që është e nevojshme për ta penguar atë", ka thënë gjenerali. Ai paralajmëroi se NATO-ja duhet të përgatitet për një sulm të mundshëm brenda katër vitesh. "Nuk ka të bëjë me sa kohë na duhet, ka të bëjë shumë më shumë me atë se sa kohë na jep Putini për t'u përgatitur. Dhe sa më shpejt të jemi të përgatitur, aq më mirë", ka thënë gjeneral Breuer. Kur bëhet fjalë për Rusinë, Gjermania ka pasur një qasje specifike. Për dekada, njerëzit në këtë vend janë rritur me idenë për ta refuzuar fuqinë ushtarake, të vetëdijshëm për rolin e kaluar të Gjermanisë si agresore në Evropë. Por kur vendet si Polonia dhe shtetet baltike paralajmëruan të mos afroheshin shumë me Moskën – dhe rritën shpenzimet e tyre për mbrojtjen – Berlini nën drejtimin e ish-kancelares Angela Merkel besonte në të bërit biznes. Tani gjenerali Breuer thotë se e sheh me rrezik retorikën agresive të presidentit rus Vladimir Putin. Breuer ka theksuar gjithashtu luftën hibride të Rusisë, duke filluar nga sulmet kibernetike te sabotimet, si dhe dronët e paidentifikuar mbi objektet ushtarake gjermane. "Ndryshe nga bota perëndimore, Rusia nuk mendon brenda linjave. Nuk ka të bëjë me kohë paqeje dhe luftë, por është një vazhdimësi sulmesh: fillojnë me luftë hibride dhe pastaj e përshkallëzojnë. Kjo është ajo që më bën të mendoj se po përballemi me një kërcënim real", ka shtuar gjenerali gjerman.