Kryeministri i Kosovës, Albin Kurti, ka reaguar pas vendimit të gjashtë deputetëve të LDK-së se nuk do ta votojnë Bekim Sejdiun si president. Ai tha se qëndrimi i tyre duket se lidhet më shumë me kundërshtimin ndaj qeverisë sesa me figurën e Bekim Sejdiut. Kurti e cilësoi marrëveshjen si një dakordësi të arritur me shumë përpjekje, duke e përshkruar si “të drejtë, të vërtetë dhe të dobishme”. “Marrëveshja politike që kemi bërë është e vlefshme, ajo marrëveshje qëndron. Është marrëveshje me shumë mund, e drejtë, e vërtetë dhe e dobishme. Çfarë të bëjmë që kishim këtë veprimin negative të 6 deputetëve. Duket qartë se nuk e kanë aq kundër Bekim Sejdiut, se sa kundër qeverisë. Për atë qëndron opozitarizmi në Kuvend dhe zgjedhje të lira demokratike. Nuk mundemi që pafundësisht të përsërisim zgjedhjet me shpresën se këtë herë do të ketë rezultate ndryshe”, tha Kurti.