Presidenti i Ukrainës, Vlodymyr Zelensky, reagoi në rrjetet socialet vetëm pak momente pasi u largua nga Shtëpia e Bardhë në takimin e tensionuar me homologun amerikan Donald Trump. Ai falënderoi katër herë Amerikën për mbështetjen dhe ka thënë se po punohet për të gjetur paqe të drejtë që t’i jepet fund luftës. “Faleminderit Amerikë, faleminderit për mbështetjen tuaj, faleminderit për këtë vizitë. Faleminderit presidenti Trump, Kongresi dhe populli amerikan. Ukraina ka nevojë për paqe të drejtë dhe të qëndrueshme, dhe ne po punojmë pikërisht për këtë”, ka shkruar ai në X. Ndërkohë që Shtëpia e Bardhë konfirmoi se Zelensky u përzu nga zyra Ovale. Lajmi u konfirmua nga një zyrtar i Shtëpisë së Bardhë që nuk ka qenë i autorizuar të flasë publikisht, sipas agjencisë prestigjioze të lajmeve “Associated Press”. Përplasja mes tyre shkaktoi një sërë reagimesh. I pari që reagoi ishte Presidenti i Francës, Emmanuel Macron, i cili përkrahu presidentin e Ukrainës, Volodymyr Zelenksy, pas përplasjes me presidentin e Shteteve të Bashkuara të Amerikës,. “Rusia është agresori, dhe Ukraina është populli i sulmuar... mendoj se ishim në rregull kur ndihmuam Ukrainën dhe sanksionuam Rusinë tre vjet më parë, dhe të vazhdojmë ta bëjmë atë... ne duhet... të respektojmë ata që kanë luftuar që nga fillimi”, ka thënë Macroni gjatë një vizite në Portugali. Zelenskyt në përkrahje i ka dalë edhe kryeministri i Spanjës, Pedro Sanchez. "Ukrainë, Spanja është me ju", ka shkruar ai. Edhe Kryeministri i Polonisë, Donald Tusk, i është përgjigjur skenave në Zyrën Ovale. “I dashur Zelensky, të dashur miq ukrainas, ju nuk jeni vetëm”, ka shkruar Tusk në rrjetet sociale. Për ngjarjen reagoi edhe Kirill Dmitriev, këshilltari i presidentit të Rusisë, Vladimir Putin. Në një postim në rrjetin social “X” ai ka shkruar shkurt se kjo është “historike”, duke ju referuar një postimi që paraqiste përplasjen në mes presidentëve.