Në imazhe shihen kutitë me vepra arti të dhëna hua nga galeritë ruse për muzeumet në Itali e Japoni, të sekuestruara sot nga autoritetet në Finlandë. Sekuestrimet bëhen prej sanksioneve ndaj Rusisë dhe janë piktura e skulptura nga muzeumi i artit në Shën Petersburg, në vlerë më shumë se 42 milionë euro. Dërgesat në rrugën e kthimit drejt Rusisë përfshijnë vepra "të paçmueshme," tha drejtori i doganave vendase Hannu Sinkonen, duke shtuar se vlerësimi prej 42 milionë euro ishte vetëm për çështje sigurimesh. Dhjetë njerëz dyshohen se kanë shkelur rregullat ekonomike të dërgesave, në lidhje me sanksionet e BE për ndalimin e kalimit të veprave të artit drejt Rusisë. Zyrtarët e doganave i ndaluan ato në fundjavë, në pikën kufitare tokësore të Vaalimaa mes Finlandës e Rusisë. Ato do të mbahen në magazinim deri në qartësimin e situatës ose në heqjen e sanksioneve, tha ministria e jashtme vendase, duke shtuar se kishte njoftuar ambasadën ruse. "Kemi konsultuar profesionistë të transportit të mallrave të çmuar dhe pakot nuk do të hapen”, shtuan zyrtarët e doganave.