Një operacion kërkimi ka nisur në Majorca të Spanjës ku të paktën 20 emigrantë janë arratisur nga një avion, kur një prej tyre hiqej sikur kishte ‘emergjencë mjekësore’. Avioni i pasagjerëve shkonte drejt Stambollit nga Kasablanka e Marokut. Por mjeti ndryshoi kurs dhe u ul në aeroportin e Palma, kur një prej pasagjerëve dukej se po pësonte një gjendje kome diabetike. Kur grupet e emergjencës mjekësore u ngjitën në bord, një grup emigrantësh doli nga dera e hapur e avionit dhe u zhdukën në pistën e mbuluar nga nata. Ndërsa burri që bënte gjoja se ishte në koma diabetike, u tha mjekëve se ndjehej shumë mirë kur mbërriti në spitalin e ishullit. Raportimet thonin mbrëmë se “pacienti i rremë” që ishte në qendër të incidentit, më vonë kërkoi azil politik. Një mik i tij që udhëtoi me të drejt qendrës mjeksore u arratis mëngjesin e sotëm. Deri tani policia vendase tha se ka kapur 11 nga të arratisurit, ndërsa 12 të tjerë mbeten të zhdukur.