Policia e Elbasanit zhvilloi një megaoperacion antidrogë në orët e para të mëngjesit të së hënës. Forca të shumta policie zbarkuan në të gjithë qarkun e Elbasanit në zbatim të operacioni të koduar “First Day” duke ushtruar kontrolle në 15 banesa ndërkohë që një sasi e konsiderueshme lënde narkotike u sekuestrua në Peqin. Sipas informacionit zyrar të Policisë së Elbasanit operacioni i ndjekur me metoda speciale të hetimit prej disa muajsh është zhvilluar në bashkëpunim me Prokurorinë dhe si rezultat i të cilit u godit rrjeti i shpërndarjes dhe tregtimit të lëndëve narkotike. Gjatë këtij operacioni u ekzekutuan 25 masa sigurie "Arrest në burg” ndërsa u arrestuan në flagrancë 5 shtetas të tjerë, si edhe 1 tjetër procedohet penalisht. Gjatë këtij operacioni u sekuestruan lënde narkotike kokainë dhe kanabis, armë zjarri (pistoletë, kallashnikov), armë gjahu, sasi e konsiderueshme municioni luftarak, peshore, thika, përforcues grushti, steka duhani të dyshuara të kontrabanduara, laptop, tablet, targa automjetesh (shqiptare dhe belge), shuma parash në euro, paund, dollarë, franga zvicerane dhe 24 celularë. Nga hetimi u dokumentua aktiviteti kriminal i këtyre shtetasve, të përfshirë në veprimtari kriminale në fushën e shitjes dhe shpërndarjes së lëndëve narkotike, të cilët vepronin në mënyrë të organizuar në grupe të vogla ose individualisht, në të gjithë qarkun Elbasan. Policia bën me dije se vijon punën për kapjen e 14 shtetasve të shpallur në kërkim.