Një ngjarje e pazakontë është regjistruar së fundmi në qytetin e Shkodrës, ku dy efektivë policie janë përfshirë në një konflikt personal që ka degraduar në përplasje fizike dhe kërcënime serioze për jetën. Të përfshirë në incident janë dy punonjës policie: Altin Preka, efektiv i njësisë “Shqiponjat”, dhe Albert Kapaj, i cili aktualisht është jashtë shërbimi dhe pjesë e Forcave të Ndërhyrjes së Shpejtë. Sipas burimeve nga policia, konflikti mes dy efektivëve ka nisur pasi patrulla e Shqiponjave ka ndaluar një automjet në të cilin ndodhej Albert Kapaj së bashku me vëllain e tij. Ndërsa ndalimi pritej të ishte rutinë, situata ka dalë jashtë kontrollit sapo Kapaj ka njohur në patrullë ish-kolegët e tij, përfshirë Altin Prekën, me të cilin raportohet se ka pasur përplasje të mëparshme gjatë kohës që punonin së bashku në FNSH. Debati verbal mes dy efektivëve ka përfunduar në përplasje fizike dhe kërcënime të tipit “do t’ju hapim barkun me plumba”. Të dy efektivët janë shoqëruar në ambientet e komisariatit dhe më pas janë marrë në pyetje. Ky incident ndodh në një kohë kur Shkodra është tronditur nga dy ngjarje të rënda kriminale. Në gjashtë ditët e fundit janë regjistruar dy atentate, ku kanë mbetur të vrarë tre persona dhe janë plagosur rëndë dy të tjerë.