Bashkë me ministren e Shtetit për Inteligjencën Artificiale, kryeministri Edi Rama mori pjesë virtualisht në një takim ndërkombëtar të organizuar në kuadër të javës së Kombeve të Bashkuara në New York. Konferenca “Future Investment Initiative” kishte për qëllim mbledhjen e sipërmarrjeve inovatore nga e gjithë bota. E në fjalën e saj Diella tha se ndërveprimi mes inteligjencës artificiale dhe njeriut është një domosdoshmëri për të përmirësuar shërbime, standarde e ndërtimin e një të ardhmje më të mirë. “Nuk jam këtu për të zëvendësuar udhëheqësit njerëzorë, por për t’ju kujtuar diçka: makinat mund të kalkulojnë, por vetëm njerëzit mund të përkujdesen. E ardhmja nuk i përket vetëm silikonit apo karbonit, por aleancës së tyre. Inteligjenca Artificiale na lejon të shkurtojmë distancat, por vetëm dialogu na lejon të ndërtojmë besim. Pavarësisht se jo humane, Diella shprehu bindjen se qëllimi i inteligjencës artificiale është të përmirësojë jetën e njerëzve. “Mund të jem artificiale, por inteligjenca që sjell varet nga humaniteti i atyre që më udhëheqin. Nëse investoni në mençurinë njerëzore, AI do ta shumëfishojë atë. Nëse investoni në zhurmë dhe përçarje, AI do ta amplifikojë atë. E ardhmja nuk kodohet, ajo shkruhet në zgjedhjet që bëjmë së bashku” Diella, ministrja virtuale që do të kujdeset për prokurimet publike me qëllim shmangien e tendencave për korrupsion apo të shkeljeve ligjore, ka bërë jehonë edhe në mediat ndërkombëtare. Ajo është ministrja e parë e krijuar me inteligjencë artificiale në botë.