Pamje të rënda vinin sot nga Jeruzalemi Lindor ku një demonstratë në zonat e aneksuara u kthye në një përplasje të dhunshme mes ushtrisë izraelite dhe protestuesve palestinezë. Ushtria izraelite po kryente operacionin për arrestimin e palestinezëve të akuzuar për vrasjen e një koloni izraelit dhe plagosjen e dy të tjerëve një ditë më parë. Gazetarët e rrjetit AFP tregonin se kishin parë kolonët izraelitë të qëllonin me gurë shtëpite palestineze, ndërsa dhjetra palestinezë u mobilizuan kundër ushtrisë. Edhe në veri të Bregut Perëndimor policia izraelite tha se po hetonte raportimet për sulm të kolonëve në shtëpinë e një palestinezi. Izraeli ka pushtuar Bregun perëndimor gjatë Luftës Gjashtë-ditore të vitit 1967. Prej atëherë rreth 700,000 kolonë izraelitë janë vendosur në Bregun Perëndimor nën mbrojtjen e ushtrisë, në vendbanime që konsiderohen “ilegale” nga komuniteti ndërkombëtar. Vrasja e djeshme e banorit izraelit dhe sulmet ndaj palestinezëve janë incidentet më të fundit në situatën e rëndë në territoret e pushtuara. I dërguari i OKB në Lindjen e Mesme, Tor Wennesland tha se ishte i alarmuar nga përshkallëzimi i dhunës.